اما تحصل حالة سرقة فنية لفنان ((أجنبي))
بيستوقفني كم علامات الاستفهام والتعجب اللي بتظهر وقتها.
ليه بيكون في مبالغة شديدة في الدفاع عن الفنان المسروق؟ وليه دايمًا بنروح نطيب خاطر الضحية ونقول له “معلش”؟
ليه كمية الدعم اللي بتوصل لحد التمجيد – حتى لو كانت مستحقة ومؤقتة – بتكون بالحجم ده؟
الاستغراب الحقيقي بييجي لما نفتكر إن كتير مننا ما بياخدش نفس الدعم لما بيتعرض لسرقة، سواء كانت فنية أو أدبية أو حتى مادية.
وبصراحة، بيوجعني إن نفس الوقفة، لو حصلت لأي فنان من وسطنا، كانت ممكن ترجّع له حقه لو كان في نفس الحماس والكثافة.
أنا مش عايز أسيء الظن وأقول إن الموضوع له علاقة بجنسية المسروق أو شكله…
ولا عايز أصدق إن في ناس مشكلتهم الحقيقية مش مع الظلم نفسه، لكن مع الظالم لو كان “مش من حبايبهم”.
أنا معنديش إجابات نهائية، بس عندي رجاء بسيط:
لو اخترت تدافع عن الحق، خليك دايمًا واقف في نفس الصف، أيًّا كان مين الضحية.
علشان ما تبقاش بتدور على “خناقة آمنة”،
وتفتكر إنك بتدافع عن الحق… وأنت في الحقيقة بس بتختار المواقف اللي ما تكلفكش كتير.