دايمًا وإنت بترسم أو بتصمم شخصية، حاول تفتكر إن أهم حاجة تكون وراها حكاية.

الفكرة مش بس في التلوين أو التقفيل أو الوضعيات المعقدة… كل ده مهم، لكن الأهم إن يكون ورا الرسمة معنى أو لحظة أو حتى تساؤل بسيط يخلي اللي بيتفرج يسرح فيها شوية، حتى لو كانت على خلفية بيضا زي الرسمة اللي رفعتها.

اللحظة اللي المتفرج فيها يبدأ يسأل: الشخصية دي عمرها قد إيه؟ إيه اللي حصل لها؟ خدت الجرح ده إمتى؟ قوية ولا ضعيفة؟… هي دي اللحظة اللي بتخلي الرسمة تعلق في ذهنه وتعيش معاه، أكتر من أي تفاصيل شكلية كنت ناوي توريهاله.

ومش معنى الكلام ده إنك ترسم حاجة شديدة الغرابة أو معقدة لدرجة إنك نفسك ماتعرفش تشرح إيه اللي بيحصل فيها، زي ما بيحصل أحيانًا في بعض رسومات الذكاء الاصطناعي.

الفكرة في الآخر إنك تخلي رسمتك واضحة، بس فيها شوية أسئلة… أسئلة إنت اللي زارعنها جوه المشهد، توصل من خلالها للشخصية أو اللحظة اللي عايز تحكي عنها، من غير ما تقول ولا كلمة.